नामिबियाविरुद्ध स्कॉटलंडचा पाच गडी राखून पहिला विजय, बेरिंग्टन-लीस्क भागीदारीने सामन्याला कलाटणी
मुंबई (गुरुदत्त वाकदेकर) : टी२० विश्वचषक २०२४ चा १२ वा सामना नामिबिया आणि स्कॉटलंड या संघांमध्ये खेळला गेला. या सामन्यात स्कॉटलंडने रिची बेरिंग्टन आणि मायकेल लीस्क यांच्या ७४ धावांच्या भागीदारीमुळे नामिबियाचा पाच विकेट्सनी पराभव केला. टी२० क्रिकेटच्या इतिहासात स्कॉटलंडचा नामिबियाविरुद्धचा हा पहिला विजय आहे.
बार्बाडोसच्या केन्सिंग्टन ओव्हलवर नाणेफेक जिंकून प्रथम फलंदाजीला आलेल्या नामिबियाने २० षटकांत ९ गडी गमावून १५५ धावा केल्या. प्रत्युत्तरात स्कॉटलंडने १८.३ षटकांत पाच गडी गमावून १५७ धावा केल्या आणि सामना पाच विकेट्स राखून जिंकला. या सामन्यात स्कॉटलंडकडून मायकेल लीस्कने दुहेरी कामगिरी केली. आधी त्याने चेंडूने चमत्कार केला, नंतर बॅटने खळबळ माजवली.
रिची बेरिंग्टन आणि मायकेल लीस्क यांच्यातील भागीदारी या सामन्याचा टर्निंग पॉइंट ठरला. वास्तविक, स्कॉटलंडने १० षटकांत तीन विकेट गमावल्या होत्या. आता संघाला मोठ्या भागीदारीची गरज होती. अशा स्थितीत बॅरिंग्टनला लीस्कची साथ लाभली आणि दोघांमध्ये ७४ धावांची भक्कम भागीदारी झाली. बेरिंग्टन ३५ चेंडूत ४७ धावा करून नाबाद राहिला तर लीस्कने १७ चेंडूत ४ चौकारांच्या मदतीने ३५ धावा केल्या. नामिबियाच्या रुबेनने त्याला आपला बळी बनवले.
नामिबियाने सामन्याची सुरुवात धक्क्याने केली. जेपी कोएत्झी पहिल्याच षटकात व्हीलचा बळी ठरला. तो खाते न उघडताच तंबूमध्ये परतला. त्याचवेळी तिसऱ्या क्रमांकावर फलंदाजीला आलेला जॅन फ्रायलिंकही केवळ १२ धावा करून बाद झाला, तर दुसरा सलामीवीर निकोलस डेव्हलिन १२ चेंडूत २० धावा करू शकला. त्याच्या रूपाने संघाला तिसरा धक्का बसला. चौथी विकेट पाचव्या क्रमांकाचा फलंदाज मालन क्रुगरच्या रूपात पडली, त्याला केवळ दोन धावा करता आल्या. यानंतर चौथ्या क्रमांकाचा फलंदाज गेरहार्ड इरास्मसने जबाबदारी स्वीकारली. कर्णधाराने ३१ चेंडूंत पाच चौकार आणि दोन षटकारांच्या मदतीने ५२ धावा केल्या. लीसने त्याला आपला बळी बनवले. या काळात नामिबियाच्या विकेट्स पडण्याची प्रक्रिया सुरूच होती. जॅन ग्रीन २८, डेव्हिन वाईज १४, रुबेन एक, जेजे स्मित ११, बर्नार्ड ६ (नाबाद) आणि तंजानी लुंगामेनी बिना 0 (नाबाद) धावा केल्या. स्कॉटलंडकडून ब्रॅड व्हीलने तीन आणि ब्रॅड करीने दोन गडी बाद केले. त्याचवेळी ख्रिस सोल, ख्रिस ग्रीव्हज आणि मायकेल लीस्क यांना प्रत्येकी एक यश मिळाले.
लक्ष्याचा पाठलाग करण्यासाठी आलेल्या स्कॉटिश संघाला २३ धावांवर पहिला धक्का बसला. लुंगामिनीने जॉर्ज मुन्सीला वाईजकरवी झेलबाद केले. त्याला केवळ सात धावा करता आल्या. यानंतर मायकेल जोन्स आणि ब्रँडन मॅककुलन यांच्यात २६ धावांची भागीदारी झाली. इरास्मसने जोन्सच्या रूपाने संघाला दुसरा धक्का दिला. तो तीन चौकार आणि एका षटकाराच्या मदतीने २६ धावा करून परतला. त्याचवेळी मॅक्युलनलाही इरास्मसने बाद केले. त्याला १९ धावा करता आल्या. यानंतर रिची बेरिंग्टन आणि मायकेल लीस्क यांनी आघाडी घेतली. दोघांमध्ये ७४ धावांची भक्कम भागीदारी झाली ज्यामुळे सामना स्कॉटलंडकडे वळला. या सामन्यात मॅथ्यू क्रॉसने तीन आणि ख्रिस ग्रीव्हजने चार (नाबाद) धावा केल्या. नामिबियासाठी इरास्मसने दोन तर रुबेन, लुंगामिनी आणि बर्नार्ड यांनी प्रत्येकी एक विकेट घेतली.
मायकेल लीस्कला सामनावीर पुरस्काराने गौरविण्यात आले.
No comments:
Post a Comment